როგორ გამოვიყენოთ ხელოვნური ინტელექტი მეწარმეობაში ?

ჯერ კიდევ რამდენიმე წლის წინ ხელოვნური ინტელექტი (AI) მხოლოდ მეცნიერული ფანტასტიკის ნაწილი გვეგონა. დღეს კი ის უკვე მეწარმეების საიმედო ასისტენტად იქცა. ამ ბლოგში მოგიყვებით, როგორ შეიძლება გამოიყენოთ AI ხელსაწყოები – ChatGPT, Gemini, Grok და სხვები – მარკეტინგისთვის, ანალიტიკისთვის, კონტენტის შესაქმნელად და ვიზუალური მასალის დასაგენერირებლად.

რატომ უნდა მივცეთ AI-ს შანსი ქართულ მეწარმეობაში?

თქვენს დროზე არავინ იზრუნებს ისე, როგორც ხელოვნური ინტელექტი. თუ მცირე ბიზნესის მფლობელი ხართ და ყველაფერს მარტო აკეთებთ, ეს ინსტრუმენტები თქვენი დამხმარე გუნდის წევრებივით იმუშავებენ, თანაც უფასოდ (ან თითქმის უფასოდ).

• გიჭირთ პოსტის იდეის მოფიქრება? AI მოგაწვდით.
• არ იცით როგორ დაწეროთ პროდუქტის აღწერა? AI გაწერს.
• გინდათ გაიგოთ, რატომ არ იყიდება თქვენი პროდუქტი ისე, როგორც ადრე? AI მოგცემთ ანალიზს.

პოპულარული AI ხელსაწყოები - მოკლე გზამკვლევი

ხშირად გვეუბნებიან: „ჰო, ჩავწერე AI-ში რაღაც, მაგრამ ვერ მივიღე ის, რაც მინდოდა“. აი, სწორედ აქ შემოდის მთავარი სიტყვა – პრომპტი. პრომპტი არის ის, რასაც AI-ს ეუბნებით, რომ შემდეგ მან შეძლოს თქვენი დახმარება. შეიძლება ჩათვალოთ, რომ ეს მისი დავალებაა – რაც უკეთ აუხსნით, მით უკეთესად შეასრულებს. თუ უბრალოდ ეტყვით: „დამიწერე პოსტი“, ალბათ, ძალიან ზოგად პასუხს მიიღებთ, მაგრამ თუ აუხსნით, ვინ ხართ, რას ყიდით, ვის ელაპარაკებით, შედეგიც ბევრად უფრო სასარგებლო იქნება. არ იფიქროთ, რომ რთულია, თავიდან შეიძლება გაგიჭირდეთ, მაგრამ დროთა განმავლობაში აუცილებლად აუღებთ ალღოს. მთავარია, გახსოვდეთ, რომ AI ხელსაწყოები ჯადოქრები არ არიან და სანამ დეტალურად არ ეტყვით, რა გსურთ და რისთვის, დამოუკიდებლად ისინი სურვილებს ვერ მიგიხვდებიან. რაც მთავარია, AI არ გაბრაზდება, არ დაიღლება და ათჯერაც რომ აუხსნათ რაღაც, ყოველთვის მოთმინებით მოგისმენთ. ასე რომ, თამამად ელაპარაკეთ და ისიც თავის საქმეს მშვენივრად გააკეთებს. ქვემოთ მოცემულია რამდენიმე პრაქტიკული პრომპტი, რომელიც თქვენს საქმიანობაშიც შეგიძლიათ გამოიყენოთ.

1. პოსტის იდეების გენერირება

“მომიფიქრე 5 კრეატიული პოსტის იდეა [პროდუქტის სახელი]-ის გასაყიდად, რომლის სამიზნე აუდიტორიაც არიან ახალგაზრდები თბილისში. იდეები უნდა იყოს ზაფხულის თემატიკაზე და შეიცავდეს იუმორს.”

2. რეკლამის ტექსტის დაწერა

“დაწერე Facebook რეკლამის ტექსტი ჩემი პროდუქტისთვის – [შეიყვანე პროდუქტი]. ტექსტი უნდა იყოს მაქსიმუმ 2 წინადადება, მიზნობრივი აუდიტორია: 25-35 წლის დედები, ბიუჯეტზე ორიენტირებული.”

3. ელფოსტის კამპანიის დაგეგმვა

“მომიმზადე ელფოსტის შაბლონი, რომლის მიზანია ძველი კლიენტების უკან დაბრუნება. გამოყენე თბილი და მეგობრული ტონი, მოიფიქრე შეთავაზება და მოკლე CTA.”

ბიზნესის ანალიზი AI-ის დახმარებით


თუ გაქვთ გაყიდვების ცხრილი Excel-ში და არ იცით, რას აჩვენებს ის რეალურად, ჩააგდეთ მონაცემები ChatGPT-ში (Pro ვერსიაში შეგიძლიათ პირდაპირ ფაილის ატვირთვა) და ჰკითხეთ: “რა ტენდენციას აჩვენებს ეს მონაცემები? რომელ თვეში მქონდა ყველაზე ნაკლები გაყიდვა და რატომ შეიძლებოდა ასე მომხდარიყო?”

ასევე შეგიძლიათ:

• შეადაროთ პროდუქტები ერთმანეთს;
• გამოითვალოთ საშუალო შემოსავალი;
• დაგეგმოთ მომდევნო კამპანია არსებული მონაცემის საფუძველზე.

ფოტოების გენერაცია – DALL·E და სხვები

არ გაქვთ ფოტოსესიის ბიუჯეტი? გამოიყენეთ AI. ChatGPT Pro-ს მომხმარებლებს უკვე აქვთ წვდომა DALL·E 3-ზე, რომლის დახმარებითაც შეგიძლიათ წარმოუდგენლად რეალისტური ფოტოები და ილუსტრაციები შექმნათ.

მაგალითი: “შექმენი საზაფხულო პიკნიკის სცენის ფოტო, სადაც ჩანს ჩემი პროდუქტი – პლასტმასის ფერადი ჭურჭელი. ფონი იყოს ბუჩქნარი, ხის მაგიდა და ოჯახური განწყობა.”

ასეთი ფოტო შეიძლება გამოიყენოთ როგორც სარეკლამო ბანერზე, ისე Instagram პოსტში.

AI პრომპტების მცირე ბიბლიოთეკა ქართულად

AI თქვენი კონკურენტი არ არის, ის თქვენი ასისტენტია. რაც უფრო ზუსტ და ჩამოყალიბებულ კითხვებს დაუსვამთ, მით უფრო გამოსადეგ პასუხებს მიიღებთ. მიეცით დავალება ისე, ისე როგორც თანამშრომელს მისცემდით – კონკრეტულად, დეტალურად და მიზანმიმართულად. და დაიმახსოვრეთ - იდეალურ შედეგამდე მხოლოდ ადამიანი მიდის, AI კი უბრალოდ გზას გაგიკვლევთ.

თუ ჯერ არ დაგიწყიათ ხელოვნური ინტელექტის ხელსაწყოებია გამოყენება, დღესვე სცადეთ. გახსენით ChatGPT, დაწერეთ პირველი პრომპტი და დააკვირდით, როგორ იწყებს თქვენი ბიზნესი სხვა ტემპით სუნთქვას.

ბლოგი მომზადებულია ელექტრონული კომერციის ასოციაციის მხარდაჭერით.