ბიზნესის დაწყება ბევრ ემოციას აერთიანებს - მოტივაციას, ინტერესს და ცოტა შიშსაც. თუმცა, სანამ ლოგოს შექმნაზე, ვებსაიტზე ან პირველ მომხმარებელზე ფიქრს დაიწყებთ, ღირს ერთი ნაბიჯით უკან დახევა. მიუხედავად იმისა, რომ ენთუზიაზმი მნიშვნელოვანია, ცოდნა არის ის, რაც წარმატებას აყალიბებს.

წარმოიდგინეთ, რომ შეგიძლიათ ისწავლოთ სხვის წარმატებებსა და შეცდომებზე - როგორია სწორად გადადგმული პირველი ნაბიჯები, რაზე უნდა იფიქროთ თავიდანვე და როგორ აიცილოთ ყველაზე გავრცელებული საფრთხეები. წიგნები ვერ გასწავლიან ყველაფერს, მაგრამ სწორ მიმართულებას აუცილებლად გაჩვენებენ. ამ ბლოგში შემოგთავაზებთ 10 წიგნს, რომლებიც დამწყებმა მეწარმემ აუცილებლად უნდა წაიკითხოს. ისინი დაგეხმარებიან როგორც სტრატეგიის, ისე პრაქტიკული ნაბიჯების დაგეგმვაში.

1.” HBR-ის გზამკვლევი მეტი პროდუქტიულობისთვის”

როდესაც სტარტაპს იწყებთ, საქმეების თავზე საყრელად გაქვთ. ყოველდღე გიწევთ გადაწყვეტილებების მიღება, პრობლემებთან გამკლავება და ათას რამეზე ფიქრი ერთდროულად. ეს გზამკვლევი, რომელიც Harvard Business Review-ის სტატიებს აერთიანებს, გაჩვენებთ მარტივ ხერხებს, როგორ იმუშაოთ უფრო მშვიდად და შედეგიანად. აქ დაწვრილებით წერია, როგორ დაგეგმოთ დღე, გაუმკლავდეთ გადატვირთულ გრაფიკს და აკონტროლოთ თითოეული საქმე.

რისთვის გამოგადგებათ: რომ არ დაიღალოთ და არ აირიოთ უამრავ საქმეში. ეს წიგნი დაგეხმარებათ, პირველივე დღიდან დროისა და ენერგიის მართვის სწორად სწავლაში.

2.  „პირველად იყო რატომ“ - საიმონ სინეკი

ეს წიგნი გეხმარებათ ერთ მნიშვნელოვან კითხვაზე პასუხის პოვნაში - რატომ აკეთებთ იმას, რასაც აკეთებთ? სინეკი გვიჩვენებს, რომ ძლიერი იდეის უკან ყოველთვის დგას შთაგონება, მიზანი და სული. მეწარმისთვის კი ეს „რატომ“ ყველაზე მძლავრი მოტივატორია.

რისთვის გამოგადგებათ: როცა სტარტაპს იწყებთ, იდეის არსის სწორად ჩამოყალიბება დაგეხმარებათ, მომხმარებელთან ემოციური კავშირიც შექმნათ და გუნდის წევრებიც გაამხნევოთ.

3. „დიდი წიგნი ბიზნესზე“ - ტომ გოლდმენი

ეს არის ერთგვარი ბიზნეს-ენციკლოპედია. წიგნი მოიცავს ფინანსებს, მარკეტინგს, მენეჯმენტს, სტრატეგიას, მოკლედ, ყველაფერს, რაც შეიძლება დამწყებ მეწარმეს დასჭირდეს. წიგნი შედგება მოკლე და პრაქტიკული ნაწილებისგან, რაც კითხვის პროცესს კიდევ უფრო სასიამოვნოს ხდის.

რისთვის გამოგადგებათ: როგორც გზამკვლევი, როდესაც გარკვეული საკითხების სწრაფად გააზრება ან გადამოწმება დაგჭირდებათ.

4. „როგორ შევქმნათ პროდუქტი, რომელიც მომხმარებელს სურს“ - ალექს ოსტერვალდერი, ივ პინიე, გრეგ ბერნარდა, ალან სმიტი

იდეა კარგია, მაგრამ რეალურად სჭირდება კი ის ვინმეს? ეს წიგნი გასწავლით, როგორ გამოიკვლიოთ მომხმარებლის ნამდვილი საჭიროებები და როგორ შექმნათ პროდუქტი, რომელსაც ბაზარზე ნამდვილად იქნება მოთხოვნა.

რისთვის გამოგადგებათ: პროდუქტის შექმნის პროცესის უკეთ გაგებაში, მომხმარებელთან ღირებულ კომუნიკაციაში და იმაში, რომ თავიდან აიცილოთ ის, რაც არ გაიყიდება.

5. „იისფერი ძროხა“ -  სეთ გოდინი

თუ მინდორში ბევრი ძროხა დგას, იისფერს ყოველთვის მიაქცევთ ყურადღებას. გოდინი ამ მარტივ მაგალითზე გვიხსნის, რატომ უნდა ვიყოთ გამორჩეული. დღეს, როცა ყველაფერი უკვე ვიღაცას აქვს მოფიქრებული, სწორედ სითამამე და სხვებისგან განსხვავებულობა ქმნის წარმატებას.

რისთვის გამოგადგებათ: თუ გინდათ, რომ თქვენი პროდუქტი ან ბიზნესი ბაზარზე შეამჩნიონ, ეს წიგნი გასწავლით, როგორ იფიქროთ სხვაგვარად და შესთავაზოთ ადამიანებს რაღაც ახალი და რეალურად საჭირო.

6. “საქმესთან გამკლავების ხელოვნება” - დეივიდ ალენი

მეწარმეობასთან პარალელურად მართვა რთულია. დეივიდ ალენის მეთოდოლოგია კი გეხმარებათ, საქმეები აღარ დაგიგროვდეთ და გონება თავისუფალი გქონდეთ. მისი სისტემით სწავლობთ, როგორ გადაიტანოთ ქაოსი ცხად სისტემაში - ერთბაშად იფიქროთ, დაგეგმოთ და იმოქმედოთ.

რისთვის გამოგადგებათ: სტარტაპის გზაზე ყოველდღე ახალ-ახალი საქმეები ჩნდება. ეს წიგნი გასწავლით, როგორ არ გადაიწვათ ამ გზაზე და მენეჯმენტი აქციოთ მშვიდ და პროდუქტიულ საქმედ.

7. „პიტერის პრინციპი: რატომ მიდის საქმეები ცუდად?“ - ლორენს ჯეი პიტერი და რეიმონდ ჰოლი

ეს წიგნი ცოტათი განსხვავდება დანარჩენი ზემოთ ჩამოთვლილებისგან, უფრო ფილოსოფიური და ირონიულია. ავტორები თავისებური იუმორითა და სარკაზმით გვიხსნიან ერთ საინტერესო იდეას - ადამიანები ხშირად დაწინაურდებიან მანამ, სანამ ისეთ პოზიციაზე არ აღმოჩნდებიან, რომელსაც კარგად ვეღარ უმკლავდებიან. მეწარმისთვის ეს წიგნი მნიშვნელოვანი შეხსენებაა, როგორ შეარჩიოს გუნდი, გადაანაწილოს პასუხისმგებლობები და სწორად შეაფასოს საკუთარი როლიც კომპანიაში.

რისთვის გამოგადგებათ: როცა საკუთარი გუნდის ფორმირებას დაიწყებთ, „პიტერის პრინციპი“ დაგეხმარებათ არამხოლოდ სხვების, არამედ საკუთარი შესაძლებლობების რეალურად შეფასებაში - რათა თავიდან აიცილოთ ის უხილავი ბარიერები, რომლებიც ბიზნესს ჩრდილივით გასდევს.

8. „როგორ მოვიფიქროთ იდეა?" - კოტე იანტბელიძე

ყველა დიდი იდეა თავში ერთი პატარა გაელვებით იწყება.
რა ხდება იმ მომენტში, საიდან მოდის ის წამიერი გაელვება, რომელმაც შესაძლოა მთელი ცხოვრება და  ინდუსტრიაც კი შეცვალოს? წიგნში „როგორ მოვიფიქროთ იდეა?" - კოტე იანტბელიძე კრეატიულობის მისტიკას ფარდას ხდის და გვაჩვენებს, რომ იდეების დაბადება არ არის ბედნიერი შემთხვევითობა, არამედ გამომუშავებადი უნარი. 

რისთვის გამოგადგებათ: თუ გინდათ იყოთ არა მხოლოდ იდეების მომხმარებელი, არამედ მათი შემქმნელი, ეს წიგნი გასწავლით, როგორ გახსნათ გონება ახალი კონცეფციებისთვის, როგორ დააკვირდეთ სამყაროს კრეატიული პერსპექტივიდან და როგორ აქციოთ ყოველდღიური გამოწვევები ინოვაციურ შესაძლებლობებად. 

9. „შეჭამე ბაყაყი - პერსონალური სამუშაო წიგნი" - ბრაიან თრეისი

რა არის ის ამოცანა, რომელზე ფიქრისასაც გული გეკუმშებათ, მაგრამ იცით, რომ მისი გადაჭრა თქვენს ცხოვრებას ან საქმეს წინ წასწევს?  ეს არის თქვენი "ბაყაყი" - და ბრაიან თრეისი გვასწავლის, როგორ "შევჭამოთ" ის დღის დასაწყისშივე."შეჭამე ბაყაყი" ყველაზე რთული და ყველაზე ღირებული ამოცანების გადაწყვეტის გამომხატველი მეტაფორაა.

რისთვის გამოგადგებათ: ეს წიგნი გასწავლით, როგორ გახდეთ მოქმედებაზე ორიენტირებული ადამიანი.წიგნი სავსეა პრაქტიკული სავარჯიშოებით, თვითშეფასების ტესტებით და დროის მართვის სტრატეგიებით, რაც დაგეხმარებათ მიღებული ცოდნა რეალურ ცხოვრებაში გამოიყენოთ.

10. „REWork - ბიზნესი ცრურწმენების გარეშე" - ჯეისონ ფრაიდი

რატომ გვჯერა, რომ გრძელვადიანი გეგმები აუცილებელია? რატომ ვფიქრობთ, რომ ბიზნესს დიდი ინვესტიცია სჭირდება? და რატომ გავრცელდა აზრი, რომ წარმატებული კომპანია აუცილებლად დიდი უნდა იყოს? ჯეისონ ფრაიდი, Basecamp-ის თანადამფუძნებელი, დროთა განმავლობაში გაჩენილ ბიზნესის ცრურწმენებს ერთმანეთის მიყოლებით ამსხვრევს და გვთავაზობს ახლებურ, მინიმალისტურ მიდგომას წარმატებული საქმის შესაქმნელად.

რისთვის გამოგადგებათ: თუ ოდესმე გიფიქრიათ საკუთარი ბიზნესის წამოწყებაზე, მაგრამ გეშინოდათ, რომ საკმარისი ფული, გამოცდილება ან რესურსები არ გაქვთ - ეს წიგნი თქვენთვისაა. ისწავლით მარტივ, პრაქტიკულ რჩევებს, როგორ დაიწყოთ ბიზნესი იმით, რაც გაქვთ - დღესვე, ახლავე. როგორ იპოვოთ პირველი მომხმარებლები, როგორ შექმნათ პროდუქტი მინიმალური დანახარჯებით და როგორ გახადოთ თქვენი ბიზნესი მომგებიანი თავიდანვე, დიდი ინვესტიციების გარეშე.

ბიზნესის დაწყებისთვის მხოლოდ იდეა საკმარისი არ არის. ეს არის ადამიანებთან ურთიერთობა, სწორად დაგეგმვა, შეცდომებზე სწავლა და მუდმივი განვითარება. ეს 10 წიგნი ვერ გაგცემთ ყველა კითხვაზე პასუხს, მაგრამ სწორი კითხვების დასმაში დაგეხმარებათ. სწორ საკითხებზე ფიქრი კი მეწარმეობის საუკეთესო დასაწყისია.

ბლოგის დასასრულს სასიამოვნო სიახლესაც გაგიზიარებთ, ,,Palitra L-თან’’ თანამშრომლობით, პროექტ ,,ლურჯი ოკეანის’’ წიგნებზე 30%-იანი ფასდაკლებით ისარგებლებთ.
გამოიყენეთ პრომოკოდი onway30 , შეთავაზება ძალაშია 31 მაისის ჩათვლით. 

ბლოგი მომზადებულია ელექტრონული კომერციის ასოციაციის მხარდაჭერით.